Kitabu saniyandeŋɛ
Ala be malɔnden a bole la wale le la.
Dunuya bɛ butɔ, mɔ be a la mansabaya,
a la hakkilimaya nun a sɛnbɛ yenna.
Nabilayi Dauda ka a fɔ le Jabura butɔ sora 19 :
« Sankole be Ala la nɔɔra ɲamakaranna;
saŋɛ be a bole la wale yitala. »
Wo butɔ, mɔgɛnu si Ala lɔn a la daare sabu la.
Kɔnɔ ka mɔgɛ be a la daarenu le tun yenna,
a te Ala la koe bɛ lɔn wonu tun sabu la.
Awa, Ala ka Iburahima lasanba le,
a be fɔla min ma kitabuenu tɔ, « Ala kanunteŋɛ. »
A mɛn ka a kanuntɛŋɛnu donu siyama tugun nasanba.
Minnu be lasanbaren,
wonu ni a la ko fɔ dunuya mɔgɛnu ye.
Nabiyonmɛ siyama be anu tɔ.
Ala yɛtɛ la kumanu be madɛnden kitabu saniyandeŋɛnu tɔ.
Ala ka wo kumanu sɛbɛ koe don
nabiyonmɛ banbanu le bolo,
anun a la kiilanu.
Anu si min fɔ, anu si a sɛbɛ ki min na,
a ka wo bɛ yita anu la.
Wolo mu, a la kiilá min tɔgɔ Pɔlu, wo ko :
« Kitabu saniyandeŋɛ bɛ be fatanden Ala le la.
A bɛnta karannɛŋɛ la. »
Wo be fen min fɔren,
Ala be lɔnna a la kitabuenu butɔ kuma le sabu la!
Misali la, Taureta be ɲɔ, Jabura be ɲɔ, anun Injila Isa.
Taureta anun Jabura be sɛbɛren Hebure kuma le tɔ,
Injila kan be sɛbɛren Girɛki kuma le tɔ.
Bɛ te nɔ wo karanna.
Kɔnɔ Ala ka a ma,
kitabuenu mayɛlɛmanta dunuya kuma siyama tɔ.
Kɔtɛ, kitabu donu ɲan bata mayɛlɛman
Mɔgɔfin kuma tugun tɔ,
alako Mɔgɔfiŋɛnu tugun ni nɔ lɔnnɛ sɔtɔla Ala la,
ka a la kitabuenu karan.
