Kitabu haaya do le ka:
Wo ni Ala la kuma labatu. Ka wo ka a mɔɛ le tun, kɔnɔ wo ma a ma, wo bata wo fan majuguya.
Jacques 1.22
Ala be malɔnden kama le?
Ala be malɔnden a bole la wale le la. Dunuya bɛ butɔ, mɔ be a la mansabaya, a la hakkilimaya nun a sɛnbɛ yenna. Nabilayi Dauda ka a fɔ le Jabura butɔ sora 19:
« Sankole be Ala la nɔɔra ɲamakaranna; saŋɛ be a bole la wale yitala. »
Wo butɔ, mɔgɛnu si Ala lɔn a la daale sabu la. Kɔnɔ ka mɔgɛ be a la daalenu le yenna, a te Ala la koe bɛ lɔn wonu tun sabu la. Wolo mu, Ala kumata mɔgɛnu ye, anu ni a lɔn a la wo kuma sabu la. Misali la, Ala ka a yɛtɛ labɔɔ Iburahima le ma, a be fɔla min ma kitabuenu tɔ, «Ala kanunteŋɛ.»
A mɛn kumata nabiyonmɛ doenu tugun ye. A be anu lasanbaren de, alako anu ni a la ko fɔ dunuya mɔgɛnu ye. Ala ka Isa tugun nasanba. Isa la ko be sɛbɛren kitabue tɔ, a ko:
«Ala ka a la sariyanu don wo mɔ bolo Musa sabu la, a ka kanunteya nun tɔɲa tugun yita wo mɔ la Isa Ala la mɔgɔ masubɛreŋɛ sabu la.»
Ala ka kuma minnu fɔ, wonu siyama le be madɛnden kitabu saniyandeŋɛnu tɔ.
Ala ka wo kumanu sɛbɛ koe don nabiyonmɛ siyama le bolo, anun a la kiilanu. Anu si min fɔ, anu si a sɛbɛ ki min na, a ka wo bɛ yita anu la. Wolo mu, a la kiilá min tɔgɔ Pɔlu, wo ko:
« Kitabu saniyandeŋɛ bɛ be fatanden Ala le la. Anu bɛ bɛnta karanna. »
Wo be fen min fɔren, Ala be lɔnna a la kitabuenu butɔ kuma le sabu la! Wo mɔ bɛnta mɔ hakkile tola a ɲinma la Ala la kitabue kuma ma, bayi Isa yati ka a fɔ le:
«Wo be Ala la sɛbɛrenu tefila ka a fɛlɛ a ɲinma la, bayi a be wo juse tɔ, ko abada kise be sɔtɔla wo sɛbɛre le tɔ. Awa, wo sɛbɛrenu le tugun mu n seede la.»
Kitabue be Isa la ko tarigue fɔren. A be a yitaren, Isa to nata dunuya, a diɲata a sɔdula nun kunnawule bɛ ma, han a ka saya sɔtɔ wo butɔ. Ala mɛn ka a lawuli, a ka tɔgɔ banba dii a ma. Kɔtɛ, min tini a la lannanteya sa ale Isa ma, a si kisi le. Kitabue be Isa la kanunteya yitaren mɔle adamadeŋɛnu la. Isa ka a la talibenu yamɔri, anu ni taga a la ko kibaru ɲinma fɔ dunuya bɛ tɔ. Ka i be diren Isa nun nabiyonmɛnu la ko lɔnna a ɲinma la, fɔ i ni kitabue karan.
I si kitabue karan kama le?
Misali la, Taureta be ɲɔ, Jabura be ɲɔ, anun Injila Isa. Taureta anun Jabura be sɛbɛren Hebure kuma le tɔ, Injila kan be sɛbɛren Girɛki kuma le tɔ. Bɛ te nɔ wo karanna. Kɔnɔ Ala ka a ma, kitabuenu mayɛlɛmanta dunuya kuma siyama tɔ. MERN be mɔgɛnu minnu kiiren Mɔgɔfindugu, wonu be wakkilɛren alako wole mɔgɔfindeŋɛnu tugun ni kitabue sɔtɔ wo sɔtɔ kuma tɔ. Kitabu kuma siyama ɲan bata mayɛlɛman Mɔgɔfin kuma tɔ. Ka i be diren lɔn sɔtɔla kitabu mayɛlɛman wale la Mɔgɔfin kuma tɔ, i ni taga yan. Wo bɛ be mala le, alako Mɔgɔfiŋɛnu ni nɔ lɔn sɔtɔla Ala ma a beeyareŋɛ la, anu ni nɔ a la kitabuenu karan anu sɔtɔ kuma tɔ.
I ni appili Kitabu Saniyandeŋɛ sabaa yan alako i ni a sa i la telefɔn tɔ.
Kitabu kuma do anun kawande sɔtɔ koe lɔgɔkun yo lɔgɔkun: i ni don mɔ la gurupu tɔ Whatsapp.
