Ala be lɔnni banba makɛnɛnna mɔ ma kitabuenu la ko sabu la! Ka min ka kitabuenu karan, a si Ala la ko lɔn de, a mɛn si mɔle adamadeŋɛnu tugun na ko lɔn.
Kɔnɔ ka i ka Ala la kuma lamɔɛ kuma do tɔ, i sɔtɔ kuma ma min na, i si a fahamu le ba? I te a kɔtɔ bɛ lɔn go! Hali i ka kumanu bɛ fahamu, kɔnɔ a te to i juse tɔ iko i sɔtɔ kuma yati. Kuma siyama le be fɔla kɛ dunuya, han kuma sigi wulu wɔrɔwila (7000) nun a kɔma. Kuma donu be ɲɔ, anu fɔlá siyata. Kuma donu tugun be ɲɔ, minnu fɔlá ma siya. Kɔnɔ Ala kan ye, kumanu bɛ si kan. Mɔgɔfin kuma sɔdula kolo iko wo kuma doenu tugun.
Ala sɛnbɛ kolo! A be fenfen min fɔla i ye, a si a fɔ le i ye i sɔtɔ kuma tugun tɔ, alako i ni a fahamu a ɲinma la. Mɔgɔfindeŋɛnu tugun bɛnta anu ni Ala la kitabue kuma sɔtɔ anu sɔtɔ kuma tɔ, anu ni a karan, anu ni Ala lɔn wo butɔ.
Bɔɔla san mugan nun a kɔma, Mɔgɔfindeŋɛnu be minnu be wakkilɛren alako kitabuenu ni mayɛlɛman Mɔgɔfin kuma tɔ. Ka fɔlɔ Taureta Musa ma, ka ke Injila Isa ma, anun Jaburu Dauda tugun: kumanu minnu be sɛbɛren wo kitabuenu tɔ, a siyama bata mayɛlɛman Mɔgɔfin kuma tɔ.
Min ka wo kitabu mayɛlɛmaŋɛ fɔlɔ, wo tabɛnden Alseni Mamaduba Garama le ma. A bata durukɔtɛ banba ma kitabu mayɛlɛman koe la, han bi a be Mɔgɔfindeŋɛnu dɛmanna wo la a ɲinma la. A la lannanteya nun a la wakkilɛ kolo, dan bele a la.
Arafan Simbaliya tugun ka dɛmare banba le ma. A la wale sabu la, kitabu kuma siyama bata mayɛlɛman Mɔgɔfin kuma tɔ. Hali wo kitabu kuma siyama to ma bɔɔ betunna, a mayɛlɛmandeŋɛ kan be ɲɔ, ale Arafan na wale le wo la. A be maren alfabétisation tugun na superviseur la, wolo be a maren a be Mɔgɔfindeŋɛnu lalimaniyala anu ni anu sɔtɔ kuma karan, anu ni a sɛbɛ.
Awa, kitabuenu tini ban mayɛlɛmanna, anu te nɔ bɔɔla kisanna. Fɔ mɔ ni a tefi a ɲinma la, mɔ ni a fɛlɛ ka kuma kɔtɛ be a fɔla ki min na, mɔle tugun be a fɔla ɲɔgɔnna le Mɔgɔfin kuma tɔ. San donu min tanbita, Mamaduba Lere Sangeya, wo tugun donta kitabu mayɛlɛmannanu la kuruŋɛ tɔ, ale tugun be malase kende le diila kɛnɛ.
Min be saren wo kunma, Mɔgɔfin kayibanu nun dendeŋɛnu tugun ni wo kuma mayɛlɛmandeŋɛnu lamɔɛ, anu ni a fɛlɛ ka a fɔɲa yati le wo la, mɔ mɛn ni a fɛlɛ ka anu be kuma bɛ lɔnden minnu be sɛbɛren wo kitabu mayɛlɛmandeŋɛnu butɔ. Wo mɔ ni mɔ la kayibanu biliya!
Mɔ dɛmanná siyama tugun be, iko Kumbasa anun Alasan, minnu sɛnbɛ kolo Faransɛ kuma tɔ.
Mɔ mɛn be wakkilɛla Mɔgɔfindeŋɛnu ye minnu bele nɔren karanna. Faida kitabu yo kitabu min be bɔɔla Mɔgɔfin kuma tɔ, mɔ be a kulɛ tugun jiganna le, alako anu ni sa memuwarunu tɔ, mɔgɛnu ni a lamɔɛ anu la telefɔnu tɔ. Ali Diallo Kuntabibi le be Mɔgɔfindugu dɛmanna a ɲinma la wo kulɛ jigan koe la.
Ala mu kɛ mɔgɛnu bɛ barajila, anun minnu bɛ be wakkilɛla alako kitabuenu ni bɔɔ Mɔgɔfin kuma tɔ!
Ala mu a mala Mɔgɔfindeŋɛnu ni Alatala lɔn kɛ kitabu mayɛlɛmandeŋɛnu sabu la, anu ni a batu sariya kɛɲa ma!
