ONG min tɔgɔ « Bɛndugu », a fɔlɔta san 2018 kari 12 ɲɔgɛ tele 12, Nante saa tɔ, Faransi jamanɛ tɔ. Kɛ ONG be lawuliren de alako anu ni anu bole lasori Mɔgɔfindeŋɛnu la ko kɔtɔ, Mɔgɔfindugu ni taga ɲatɔ. ONG « Bɛndugu » mɔgɛnu be anu nɛɛnɛdɔndɛnu tugun dɛmanna minnu be sabatiren La Gine dula donu tɔ, iko Konakiri. Wo butɔ, Mɔgɔfindeŋɛnu le ka a fɔlɔ minnu be jamanɛ donu tɔ, anu nun Mɔgɔfindeŋɛnu minnu be sabatiren La Gine, anu be walila ɲɔgɔn na. Elhadji Mohamed Lamine Diallo le be maren « Bɛndugu » la ɲatɔnka fɔlɛ la. A be « Bɛndugu » la wale donu ɲamakarenden wideo butɔ min be yan kunma, a mɛn be Mɔgɔfindeŋɛnu lalimaniyala anu ni anu bole don ɲɔgɔn bolo alako Mɔgɔfindugu ni taga ɲatɔ. 

ONG Bɛndugu be diren Mɔgɔndugu la ko ni makɛnɛn, anu mɛn ni mɔgɛnu lalimaniya Mɔgɔfin kuma fɔ koe la. Anu be wolo tɔ Mɔgɔfindeŋɛnu tɛma, kɔnɔ hali La Gine dula donu tugun tɔ, Afiriki jamanɛ donu tɔ, anun Mɔgɔfindeŋɛnu be kan do kan. Anu be kɛnɛ fidawunu mala Mɔgɔfindugu, mɔgɔfindeŋɛnu siyama si taga min tɔ. Mamadɛn belebele le be mala wo wagate, sumuŋɛ ni ma a ɲinma la Mɔgɔfin kuma tɔ.

ONG « Bɛndugu » be kɛnɛ a fɛlɛla tugun haju minimannu be Mɔgɔfin saanu ma, anu ni naa anu dɛman wo tɔ. Misali la, kɛ saŋɛ donu minnu tanbita, jamin donu bata ɲiɲa, kapinɛ donu bata sɔ. Ka Mɔgɔfindeŋɛ do be min be bandiren han, ka wo ma aksidan ka min masɔtɔ, anu si kata wo tigi dɛman koe la. Anu si nafule bɔɔ kasange sɔŋɛ la, ka wo ma sarika bɔɔ koe la.